Asmaradana

Tinulis dening winasis/ Yen ana pitung prakara/ Sepisan surya kang manjer/Kapindhone yeku candra/

Kartika lan samodra/ Maruta dahana kudu/ Lan bhumi ingkang pungkasan//

Bagaskara kang miwiti/ Tegese kuat lan rosa/ Gawe makmuring rakyate/ Katone cahya sumirat/ Nguripi mring kawula/ Kaya uwit butuh banyu/ Yakuwi tegese surya//

Kapindhone maharesmi/ Katon endah ing ambara/ Madya ratri kang seksine/ Sasmita sinudarsana/

Kanggo para manungsa/ Madya ratri katon tangsu/ Bagaskaraning rahina//

Jaman edan amenangi/ Kawula Gusti asedya/ Manungsa lan ing nginggile/ Kartika sisihan candra/

Paring para manungsa/ Cahya endah lan pituduh/ Amrih bekti lan utama//

Pungkasane banyu mili/ Pesthi ana ing samodra/ Ra ketung jero jembare/ Tegese dadi panggonan/

Kang nampa pangawikan/ Welas asih anteng iku/ Jalanidhi lan samodra//

Yen sira krasa sembribit/ Tegese iku maruta/ Bathara Bayu asale/ Yeku gusti lan kawula/

Gusti lan kawula padha/ Mboten wonten ingkang unggul/ Lan gusti kudu ngumbara//

Saklajenge yeku geni/ Sira kudune waspada/ Ananging senthir contone/ Dadi padanging rahina/

Ngedegake kabecikan/ Ing papan panggonan mau/ Yeku kang aran dahana//

Ciptanira Sang Hyang Widhi/ Sasmita ingkang pungkasan/ Cakra ing jagat tegese/ Aweh hasil kanggo para/

Manungsa ingkang ngolah/ Lan manungsa kang satuhu/ Cakraning Hyang Antaboga//

Menika sipate gusti/ Kang ana pitung prakara/ Bilih Gusti ora sare/ Weh wasita pra manungsa/

Gusti kang sae punika/ Kang nduweni sipat pitu/ Sasmita sinudarsana//

Dadi pungkasan kaesthi/ Sipat kang dadi pungkasan/ Ngedab-edabi wujude/ Yeku kang sebut angkasa/

Panggonaning aruna/ Uga kartika lan tangsu/ Jembar kang tanpa winetas//